Реһан Асимқизи Мәхпирова 1949-жили 1-сентябрьда Алмута вилайитиниң илгәрки Челәк (һазирқи Әмгәкчиқазақ) наһийәсигә қарашлиқ Челәк йезисида туғулған. Қурманғази намидики Алмута дөләт сәнъәт институтиниң театр факультетидики актерлар бөлүмини түгәткән.
Сәнъәт саһасидики әмгәк паалийитини дәсләп С.Сейфуллин намидики Қарағанда вилайәтлик қазақ театридин башлап, мәзкүр дәргаһ сәһнисидә қоюлған «Наркес» (муәллипи И.Юмагулов) спектаклида – Наркесниң, «Тутқунларда» (Қ.Мухаметжанов) – адвокатниң, «Дуэльда» (М.Байджиев) – Назыниң, «Дәсләпки муәллимдә» (Ч.Айтматов) – Алтынайниң вә башқиларниң рольлирини утуқлуқ ойнайду.
1971-жили Абай намидики Җамбул вилайәтлик театриға йөткилип, иҗадий издинишини бу йәрдиму давамлаштуриду. Шуниң нәтиҗисидә «Аюбайниң әҗили» (С.Адамбеков) спектаклидики – Жанарниң, «Фудзиямиға көтирилиштики» (Ч.Айтматов) – Анарниң, «Қазақ солдитидики» (Ғ.Мүсрепов) – Ботаниң, «Сирлиқ тиләмчидики» (Я.Солович) – Ғабиканиң, «Тиниқ Дондики» (М.Шолохов) – Аксиньяниң, «Палван Чолақтики» (С.Муқанов) – Ғалияниң вә башқиларниң образлири көңүлдикидәк яритилиду.
У мәзгилләрдә актриса сүпитидә шәкиллиниш җәриянини баштин кәчүрүватқан яш сәнъәткарниң дәсләпки утуқлири мунасип баһалинип, бир нәччә қетим саһаға мунасивәтлик идариләрниң Пәхрий ярлиқлири вә дипломлири билән тәғдирлиниду.
Р.Мәхпированиң Җумһурийәтлик дөләт Уйғур музыкилиқ комедия театридики паалийити болса, 1977-жилдин башланди. Бу дәргаһта ишлигән жиллар җәриянида у кәспий җәһәттин техиму өсүп, йетәкчи сәһнә маһирлири қатаридин орун алди. Миллий сәһнимиздә жүргән қириқ жилдин ошуқ вақит ичидә у яратқан нурғунлиған образлар һазирқи яш сәнъәткарлар үчүн үлгә-нәмунә болуп кәлмәктә. Мәсилән, униң «Пәрһат-Ширин» (муәллипи Н.Һекмәт) спектаклидики – Мехменебану, «Назугумдики» (Җ.Босақов) – Назугум, «Ләйли-Мәҗнундики» (Ш.Хуршид) – Ләйли, «Парасәтсиз тәхсирдики» (Мольер) – Доримена, «Одиссейниң ғәзивидики» (А.Вальехо) – Диона, «Ғерип-Сәнәмдики» (И.Саттаров, В.Дьяков) – Һәлимә, «Анархандики» (Җ.Асимов, А.Садиров) – Гүлзарә, «Бир түп алмидики» (Ә.Оразбеков) – Ана, «Келинләр қозғилиңидики» (С.Ахмад) – Пәрманбүви, «Ялғуз ялпуздики» (Ә.Һаширий) – Алтын, «Ақ йеғиндики» (Т.Тохтәмов) – Патәмхан вә башқиму көплигән рольлири тоғрилиқ шундақ дейиш мүмкин.
Р. Мәхпировани көпчилик шундақла даңлиқ күлкә маһири сүпитидә тонуйду. Чүнки у әл арисида интайин аммибап болған «Тәбәссүм» һәзил-күлкә программисиниң асасини салғучиларниң бири болуп, таки бүгүнки күнгичә миниатюриларда роль ойнап кәлмәктә.
Т.Аблизова иккиси һәмкарлиқта сценарийини язған «Ана йәр сәдәплири» намлиқ қоюлум 2002-жили «Media Wave» фестивалида жуқури баһаларға еришип, улар диплом билән тәғдирләнди.
1996-жили миллий сәнъитимизниң риваҗлинишиға салмақлиқ үлүш қошқан Р.Мәхпироваға «Қазақстан Җумһурийитиниң хизмәт көрсәткән артисти» дегән шәрәплик нам берилди. У шундақла Уйғур меценатлар клуби тәрипидин тәсис қилинған «Илһам» мукапитиниң саһиби.

Туғулған вақти вә орни:
1-май, 1957-жил, Үрүмчи шәһири, ШУАР (ХХҖ).
Тәһсил көргән билим дәргаһлири:
Н.В.Гоголь намидики Алмута бәдиий сәнъәт училищеси, «рәссам-декоратор» мутәхәссислиги бойичә.
Т.Жүргенов намидики Қазақ миллий сәнъәт академияси, «Театр техникиси вә спектакльларни безәш» мутәхәссислиги бойичә (1980 – 1985).
Москва дөләт мәдәнийәт вә сәнъәт университети.
Қ.Ғоҗамияров намидики Җумһурийәтлик дөләт академиялик Уйғур музыкилиқ комедия театриға ишқа қобул қилинған вақти вә һазирқи лавазими:
1985-жил, баш рәссам.
Һәрхил жилларда атқурған мәсъул хизмәтлири:
Н.Акимов намидики Санкт-Петербург музыкилиқ комедия театрида – сценограф (1983 – 1985).
Санкт-Петербург шәһиридики Е.С.Деммени намидики қочақ театрида – сценограф (1983 – 1985).
Қурманғази намидики Қазақ миллий консерваториясидә – оқутқучи (2011 – 2014).
Т.Жүргенов намидики Қазақ миллий сәнъәт академиясидә – оқутқучи (2005 – 2018).
Униң безәлләндүрүшидә сәһниләштүрүлгән спектакльлар:
«Мөшүкниң өйи» (муәллипи С.Маршак, режиссери Х.Зәйнавдинова), «Гүләңгүчтики иккиси» (муәллипи У.Гибсон, режиссери Н.Сабирова), «Бөшүк нахшиси» (муәллипи Т.Минуллин, режиссери Я.Шәмиев), «Илтимас, ериңизни сетиңа» (муәллипи М.Задорнов, режиссери Ә.Искәндәров, «Алтун ачқуч» (муәллипи А.Толстой, режиссери Ә.Искәндәров), «Тәғдир ишиги» (муәллипи Ш.Башбеков, режиссери Я.Шәмиев), «Идиқут» (муәллипи Ә.Һаширий, режиссери Я.Шәмиев), «Чивинләр падишаси» (муәллипи У.Голдинг, режиссери Я.Шәмиев), «Майсәриниң иши» (муәллипи Һ.Ниязи, режиссери Я.Шәмиев), «У яқта җим-җитлиқ» (муәллипи В.Дельмар, режиссери М.Һезимов), «Ялғуз ялпуз» (муәллипи Ә.Һаширий, режиссери Я.Шәмиев), «Ғунчәм» (муәллипи З.Қадирий, режиссери М.Һезимов), «Муқам сири» (либретто муәллипи вә режиссери Я.Шәмиев), «Мәҗнун жигитләр» (муәллипи Б.Муқай, режиссери Ә.Искәндәров), «Алчилиқ бағ» (муәллипи А.Чехов, режиссери Я.Шәмиев), «Апәт» (муәллипи вә режиссери Я.Шәмиев), «Назугум» (инсценировка муәллипи Г.Насирова, режиссери Ә.Искәндәров), «Махмут Қәшқәрий» (муәллипи Ә.Әхмәтов, режиссери М.Һезимов), «Ипәк йоли» аһаңлири» (муәллипи вә режиссери Я.Шәмиев), «Ромео вә Джульетта» (муәллипи У.Шекспир, режиссери Я.Шәмиев), «Қәшқәрдә мәшъәл» (муәллипи А.Бавдинов, режиссери Ә.Искәндәров), «Ғерип-Сәнәм» (муәллиплири В.Дьяков, И.Саттаров, режиссери М.Әхмәдиев), «Тәнһа юлтуз» (муәллипи Н.Аббасхан, режиссери Я.Шәмиев), «12 муқам» түркүми (муәллипи Ә.Һаширий, режиссери М.Әхмәдиев), «Мениң билән муңдашқин...» (муәллипи Г.Насирова, режиссери Е.Нурсултан), «Чарбағ» (муәллипи Ә.Һаширий, режиссери Ә.Искәндәров), «Ләйли-Мәҗнун» (муәллипи Ш.Хуршид, режиссери М.Атажанов), «Һәқ егиләр сунмас» (муәллипи вә режиссери Ә.Әхмәтов) вә башқиму көплигән спектакльлар билән жигирмә жилдин ошуқ вақит җәриянида Уйғур театриниң сәһнисидә қоюлған «Тәбәссүм», «Бараңлиққа мәрһәмәт», «Йеңи жиллиқ гүлхан» охшаш һәрхил мәйрәмлик программиларниң, «Сада», «Нава», «Рухсарә» ансамбльлири концертлириниң сәһнә безигүчиси һәм кийим-кечәклириниң рәссами.
Муваппәқийәтлири вә мукапатлири:
Астана шәһиридә өткән І хәлиқара «Сәһнә әсәрлири кийим-кечәклири» фестивалиниң ғалиби (2007),
Қазақстан Җумһурийити Театр әрбаплири иттипақиниң «Еңлікгүл» мукапитиниң саһиби (2009),
«Қазақстан Республикасының Тәуелсіздігіне – 20 жыл» юбилейлиқ медали (2011),
«Ерен еңбегі үшін» медали (2016) вә башқиму көплигән хәлиқара, җумһурийәтлик конкурс-фестивальларға, көргәзмиләргә иштрак қилип, диплом, тәшәккүрнамиләр билән тәғдирләнгән.

Туғулған вақти вә орни:
15-май, 1946-жил, Алмута шәһири.
Тәһсил көргән билим дәргаһлири:
П.Чайковский намидики Алмута музыка училищеси, дирижерлуқ бөлүми (1964 – 1968),
Қурманғази намидики Қазақ миллий консерваторияси, дирижерлуқ факультети (1968 – 1974),
Москва оперетта театри йенидики курс, оперилиқ-симфониялик оркестр дирижери (1979 – 1981).
Қ.Ғоҗамияров намидики Җумһурийәтлик дөләт академиялик Уйғур музыкилиқ комедия театриға ишқа қобул қилинған вақти вә һазирқи лавазими:
1972-жилдин 2025 жилғичә баш дирижер.
Музыка иҗат қилған спектакльлар:
«Чинтөмүр батур» (муәллипи Һ.Абдуллин, режиссери Қ.Абдурасулов), «Шәнбә күни – тойға!» (муәллипи М.Байджиев, режиссери Қ.Жетписбаев), «Гиләмчиләр» (муәллипи М.Зулпиқаров, режиссери Ш.Шаваев), «Өмчүк тори» (муәллипи Ә.Әхмәтов, режиссери Я.Шәмиев), «Махамбет» (муәллипи Ә.Тарази, режиссери С.Асылханов) вә башқилар.
Муваппәқийәтлири вә мукапатлири:
Қазақстан Җумһурийити Мәдәнийәт министрлигиниң «Мәдениет саласының үздігі» төшбәлгүси билән мукапатланған.

Турдибүви Аблизова 1950-жили 4-мартта Алмута вилайитигә қарашлиқ Уйғур наһийәсиниң Чоң Ақсу йезисида туғулған. 1966-жили Уйғур театриниң йенида ечилған икки жиллиқ актерлуқ маһарәт студиясини тамамлиғандин башлап дәм елишқа чиққичә мәзкүр сәнъәт дәргаһида паалийәт елип кәлди.
Өткән жиллар ичидә у һәрхил жанрдики әсәрләр қәһриманлириниң образлирини муваппәқийәтлик яритиш арқилиқ көпчиликкә тонулған пешқәдәм сәнъәткарлар қатаридин орун алди. Т.Аблизова ойниған рольлар интайин нурғун. Уларниң ичидә «Пәрһат-Шерин» (муәллипи Н.Һекмәт) спектаклидики Мехменебану, «Қейинанидики» (М.Шамхалов) – Апәт, «Айман-Шолпандики» (М.Әвезов) – Айман, «Ана тәғдиридики» (Җ.Асимов) – Айнурәм, «Нурхандики» (К.Яшен) – Қумрихан, «Анархандики» (Җ.Асимов, А.Садиров) – Майимхан, «Ғерип-Сәнәмдики» (И.Саттаров, В.Дьяков) – Гүлбадәм, «Парасәтсиз тәхсирдики» (Мольер) – Журденниң аяли, «Лашмандики» (З.Сәмәдий) – Санийә, «Кавказлиқ сиңилдики» (В.Есьман, К.Крикорян) – Биби,«Бир яз, бир киштики» (М.Бақиев) – Һәвәсхан, «Паһ, жигитләрдики» (Қ.Шаңғытбаев, Қ.Байсеитов) – Нурсулу, «Аршин мал аландики» (У.Гаджибеков) – Телли, «Улар бәш қиз едидики» (Б.Васильев) – Кирьянова, «Малиновкидики тойдики» (А.Александров, Л.Юхвид) – Гапуся, «Шәнбә күни – тойғадики» (М.Байджиев) – Сайраш, «Анамниң ақ көйнигидики» (Ш.Хусаинов) – Ана, «Король Лирдики» (У.Шекспир) – Гонорилья, «Ким әйипликтики» (Қ.Мәңсүров) – Хеличә, «Дозақтики» (А.Өзүбеков) – Мәликә, «Мейизлик қизил алмидики» (Э.Хушвақтов) – Ана, «Келинләр қозғилиңидики» (С.Ахмад) – Сатқунбүви, «Ғерипләрдики» (В.Дельмар) – Купер Люси, «Мәшһур Гален» (К.Чапек) – Маршал охшаш бирқатар рольлар актриса паалийитидики жирик рольлар болуп һесаплиниду.
Т.Аблизова шундақла көплигән концертлиқ программиларниң мәзмунлуқ өтүшигә салмақлиқ төһпә қошқан истедатлиқ риясәтчи. Униң классик шаирларниң ғәзәллирини ипадилик оқуш маһаритиму алаһидә диққәткә сазавәрдур.
2002-жили театрниң драма трупписиниң тәркивидә Венгриядә өткән хәлиқара «Media Wave» бәйнәлмиләл аудио-визуал сәнъәт фестивалиға иштрак қилип, биринчи дәриҗилик диплом билән тәғдирләнди.
Буниңдин башқа пешқәдәм сәнъәткар «Әмгәк ветерани», «Қазақстан Республикасы Тәуелсіздігіне 10 жыл», «Ерен еңбегі үшін» медальлири билән мукапатланған.

Роза Тохтахунқизи Бәхтибаева 1953-жили 23-май күни Алмута вилайитиниң Челәк йезисида туғулған. Оттура мәлуматқа егә. 1976-жили бәдиий рәһбәрликниң тәкливигә бенаән Уйғур театриға ишқа қобул қилинип, сәнъәт саһасидики паалийитини дәсләп иҗрачи сүпитидә «Яшлиқ» ансамблидин башлиған.
Кейинирәк сәнъәткарниң актерлуққа майиллиғи аян болуп, спектакльларда роль ойнашқа тәклип қилиниду. Өзиниң дәсләпки рольлири арқилиқла режиссерларниң ишәнчисини ақлиған у һәм комедиялик, һәм трагедиялик рольларниң һөддисидин чиқишқа қадир пешқәдәм актрисилардин болуп йетилди. Шуңлашқа узун жиллар мабайнида миллий сәһнимиздә Р.Бәхтибаева яратқан образлар интайин көп. Уларниң арисида «Анархан» (муәллиплири Җ.Асимов, А.Садиров) спектаклидики – Гүлзариханниң, Петханниң, «Қайғулуқ күнләрдики» (Җ.Розиев) – Ванганянниң, «Ким кимгә ашиқтики» (В.Есьман, К.Крикорян) – Нативанниң, «Улар бәш қиз едидики» (Б.Васильев) – Соня Гурвичниң, «Келинләр қозғилиңидики» (С.Ахмад) – Сатқунбүвиниң, «Қар көчкүнидики» (Т.Жуженоғли) – қери аялниң, «Король Лирдики» (У.Шекспир) – Регананиң, «Дәрвишниң муһәббити, данишмәнлиги вә өлүмидики» (Т.Зулфиқаров) – Аниниң, «Ғерип-Сәнәмдики» (И.Саттаров, В.Дьяков) – Раһиләниң, «Ана мирасидики» (Д.Мәшүрова, М.Һошуров, М.Һезимов) – Майсимәмниң, «Мирас мончақтики» (Һ.Гүлиев) – Анарханниң рольлирини алаһидә мәмнунийәт билән тилға елишқа әрзийду.
У шундақла «Тәбәссүм» шоу-программисидики миниатюриларниң көңүлдикидәк қоюлушиғиму мунасип төһпә қошқан сәнъәткарларниң бири.
Р.Бәхтибаева 1981-жили Җ.Розиевниң «Қайғулуқ күнләр» драмисидики Ванганянниң роли үчүн «Жігер» яшлар фестивалида мәхсус дипломға егә болди.
Пешқәдәм сәнъәткарниң узун жиллиқ әмгиги инавәткә елинип, у Қазақстан Җумһурийити Мәдәнийәт министрлигиниң «Мәдениет қайраткері» бәлгүси билән мукапатланди.

Баһаргүл Абдуреһимқизи Әхмәдиева 1956-жили 29-февральда ШУАРниң (ХХҖ) Үрүмчи шәһиридә дунияға кәлгән. Тәғдир тәқазасиға бола ата-аниси билән биллә сабиқ Кеңәш Иттипақиға көчүп чиққан у 1977-жили А.Н.Островский намидики Ташкәнт дөләт театр вә бәдиий сәнъәт институтиниң «Театр вә кино актери» бөлүмини тамамлиғандин кейин Уйғур театриға ишқа қобул қилинған.
Өткән жиллар җәриянида у актриса сүпитидә театр тәнқитчилири вә тамашибинлар тәрипидин яхши қобул қилинған бирпүтүн образлар галереясини вуҗутқа кәлтүрди. Уларниң арисида «Ақ кемә» (муәллипи Ч.Айтматов) спектаклидики – бала, «Анархандики» (Җ.Асимов, А.Садиров) – Ләйлихан, «Прокурорниң ярдәмчисидики» (Н.Думбадзе) – Марика, «Төмүр хотундики» (Ш.Башбеков) – Аламәт, «Келинләр қозғилиңидики» (С.Ахмад) – Нигара, «Король Лирдики» (У.Шекспир) – Карделия, «Майсариниң ишидики» (Һ.Ниязий) – Майсарә, «Ғерип-Сәнәмдики» (И.Саттаров, В.Дьяков) – Айим Мәликә, «Алчилиқ бағдики» (А.Чехов) – Раневская, «Идиқуттики» (Ә.Һаширий) – Бөрте, «Ромео вә Джульеттидики» (У.Шекспир) – Капулетти хеним охшаш ярқин яритилған образлар бар. Буниң һәммиси актрисиниң иҗрачилиқ маһаритиниң үстүнлүгини һәм кәңдаириликлигини испатлайду.
Б.Әхмәдиеваниң сәнъәт саһасидики паалийитидә «Яшлиқ» ансамбли алаһидә орунни егиләйду. У 1977-жилдин башлап узун жиллар мабайнида Қазақстан Ленин Комсомоли мукапитиниң вә хәлиқара конкурс-фестивальларниң лауреати аталған мәзкүр ансамбльниң турақлиқ нахшичиси болди.
Кейинки жилларда Б.Әхмәдиева оқутқучилиқ паалийәт биләнму шуғуллинип кәлмәктә. У билим бәргән Т.Жүргенов намидики Қазақ миллий сәнъәт академиясиниң бир топ учумкарлири әйни вақитта Уйғур театрида устазиниң ишини давамлаштуруватиду.
Б.Әхмәдиеваниң үнүмлүк әмгиги мунасип баһалинип, у һәрхил жилларда «Құрмет» ордени (2015-ж.) вә «Ерен еңбегі үшін медали» (2004-ж.) һәм шундақла бир нәччә қетим Мәдәнийәт министрлигиниң, вилайәт, наһийә һакимлириниң Пәхрий ярлиқлири билән мукапатланди.

Туғулған вақти вә орни:
7-июнь, 1949-жил, Таштиқара (һазирқи Амангелди) йезиси, Әмгәкчиқазақ наһийәси, Алмута вилайити.
Тәһсил көргән билим дәргаһи:
П.Чайковский намидики Алмута музыка училищеси, вокал бөлүми.
Қ.Ғоҗамияров намидики Җумһурийәтлик дөләт академиялик Уйғур музыкилиқ комедия театриға ишқа қобул қилинған вақти вә һазирқи лавазими:
1974-жил, оркестр артисти.
Иҗат қилған нахшилири:
«Ғәлбинур» (мәтини А.Мутәллипниң), «Туғулғун йәр» (мәтини Җ.Розиевниң), «Вай, аппиғим» (мәтини Җ.Розиевниң), «Дехан қизиға» (мәтини Ә.Әхмәтовниң).
Гастрольлуқ сәпәрлири:
Россия, Өзбәкстан, Қирғизстан, Түркмәнстан, Пакстан, Португалия, Түркия, ШУАР (ХХҖ).
Муваппәқийәтлири вә мукапатлири:
Москва шәһиридә өткән Дуниявий яшлар вә студентлар фестивалиниң иштракчиси («Яшлиқ» ансамблиниң тәркивидә),
Қазақстан Ленин Комсомоли мукапитиниң лауреати («Яшлиқ» ансамблиниң тәркивидә),
Қазақстан Җумһурийитиниң хизмәт көрсәткән артисти,
Әмгәкчиқазақ наһийәсиниң Пәхрий пухраси.