Яшлиғи кәтти кәлмәскә...

Өткән шәнбә күни Қ.Ғоҗамияров намидики җумһурийәтлик дөләт академиялик Уйғур музыкилиқ комедия театрида пешқәдәм сазәндә һәм бәстикар Абдуразақ Һәмраевниң 70 яшлиқ тәвәллудиға беғишанған «Яшлиғим кәтти кәлмәскә...» намлиқ иҗадий кәч өтти. Униңға «Нава» фольклор вә «Рухсарә» уссул ансамбльлири иштрак қилди.

Абдуразақ Аюпоғли мәктәп чағлиридин башлап бәдиий һәвәскарлар өмигигә қатнишип, сәнъәткә зор иштияқ бағлап өсти. Оттура мәктәпни тамамлап, Өзбәкстанниң Сәмәрқәнт музыка училищесида тәһсил көриду. Мәзкүр билим дәргаһини тамамлиғандин кейин, йәни 1974-жилдин тартип Уйғур театридики «Нава» ансамблиға дапчи болуп орунлишиду. Театрда Абдуразақ Һәмраевниң кәспий сәнъәткар болуп шәкиллинишидә Қуддус Ғоҗамияров, Ғопурҗан Қадирһаҗиев, Зәйнуллам Сетәков, Үсүпҗан Сайитов, Икрим Мәсимов, Азат Бурһанов кәби устазлири чоң роль ойниди. Бәстикар өз иҗадийитидә М.Абдрахманов, Т.Илиев, Х.Һәмраев, Җ.Розахунов охшаш бирқатар көрнәклик шаирлар билән иҗадий һәмкарлиқта ишләп, мисралирида һаят мәзмуни муҗәссәмләнгән бир түркүм нахшиларни вуҗутқа кәлтүрди.

Абдуразақ Һәмраев әллик жил мабайнида «Нава» ансамблида паалийәт елип барди. У миллий театримизниң Қазақстанниң тәвәлиридин башқа Өзбәкстан, Қирғизстан, Түркмәнстан, Венгрия, Һиндстан, Авғанстан, Сингапур, Пакстан, ШУАРға болған гастрольлуқ сәпәрлиридә уйғур сәнъитини чоң сәһниләрдә тонутуп, дәриҗисиниң йеңи пәллигә көтирилишигә зор төһпә қошти. Иҗат қилған нахшилириму кәң аммиға тарқалди. Талантлиқ сазәндә өткән әсирниң 80-жиллири бир топ қазақстанлиқ сәнъәткарлар билән Авғанстанда гастрольлуқ сәпәрдә болуп, бәйнәлмиләл-җәңчиләргә концерт қоюп, уларниң роһини көтәрди. Бу ховуплуқ сәпәрдә у кәсипдашлири – Қазақстанниң хизмәт көрсәткән артисти, атақлиқ уссулчи Адаләт Әкбәрова, Саадәт Сопиева билән биллә болған. Мошу җәңгивар сәпири үчүн Абдуразақ Аюпоғли Бауыржан Момышулы медали билән мукапатланди.

Мәлумки, униң иҗадида анилар мавзуси алаһидә орун егиләйду. Болупму даңлиқ шаир Тейипҗан Илиевниң шеирлириға йезилған «Анамни әсләп», «Жүрәк яшлирим», «Пуған» қатарлиқ нахшилири тамашибинниң қәлб төридин орун алған.

Кәч давамида театр сәнъәткарлири музыкисини Абдуразақ Һәмраев иҗат қилған «Дуния бу», «Бу һаят», «Дилраба», «Яшлиқ чағда», «Җананлар чүшсә уссулға» қатарлиқ вә башқиму нахшиларни орунлиди. Униңға «Рухсарә» уссул ансамбли җор болуп, тамашибинға һөзүр-һалавәт беғишлиди.

Кәч ахирида театрниң бәдиий рәһбири Фархат Қанафин һаятиниң йәтмишинчи даваниға қәдәм ташлиған Абдуразақ Аюпоғлиға ҚҖ Мәдәнийәт вә әхбарат вице-министриниң тәбрик хетини тапшурди. Мошу йәрдә мәзкүр концерт программисиниң утуқлуқ өтүшигә зәмин яратқан сәһниләштүргүчи режиссер Бәхитҗан Авдуновниң, сценарий муәллипи Гүлбаһар Насированиң, «Нава» ансамблиниң рәһбири Ниязҗан Турсуновниң, балетмейстер Һәҗәрбүви Халимованиң вә рәссам Рустәм Мусаевниң әҗрини алаһидә тәкитлигән орунлуқ.

Хулләс, бу кәч шу күни Уйғур театриниң босуғисини атлиған һәрбир жүрәккә мәлһәм берип, қәлблирини саз-нәғмиләр вә роһий озуқ билән суғарғини сөзсиз.

Зульфира МАИСМЕЛИЕВА,

«Uiğur avazi»

https://uyguravazi.kazgazeta.kz/news/53511