Йеңи утуқлар вә йеңи пәллиләр мәвсүми

Қуддус Ғоҗамияров намидики җумһурийәтлик дөләт академиялик Уйғур музыкилиқ комедия театри новәттики 92-мәвсүмини даңқи мәшһур «Анархан» музыкилиқ драмиси билән йепип, йәнә бир иҗадий жилға хуласә чиқарди. Бу мәвсүмдә театр сәһнисидә бир-биридин қизиқ, мәзмунлуқ вә тамашибин көңлигә йол тапқан йеңи спектакльлар сәһниләштүрүлүп, миллий театр тәрәққиятиға йәнә бир муһим сәһипә қошулди.

Мәвсүм давамида көплигән спектакльларниң премьерилири өтүп, қутлуқ сәһниниң гүллинишигә һәссә қошқан бирқатар пешқәдәм сәнъәткарларниң тәвәллудлири, шундақла хатириләш кәчлириму өтти. Җүмлидин «Бекәт», «Әсирләрдин алқиған Абай» драмилири, «Сениң қаракөзлириң», «Келинләр қозғилиңи», «Примадоннилар» комедиялири сәһниләштүрүлүп, тамашибин қәлбидин орун алди. Һәрбир премьера иҗадий топниң издиниши билән йеңи режиссерлуқ көзқарашларниң нәтиҗиси болуп, театр репертуариниң мәзмун җәһәттин техиму бейишиға түрткә болди.

«Тәбәссүм» һәзил-күлкә кечилигиниң 40 жиллиғи – мәвсүмниң әң диққәт мәркизидә болған театрниң әң мувәппәқийәтлик лайиһилириниң бири һесапланди. Шу мунасивәт билән Җумһурийәт сарийида уюштурулған чоң концертта һәрхил әвлат сәнъәткарлири җәм болуп, нахша-саз, миниатюрилар арқилиқ тамшибинға хизмәт қилған қириқжиллиқ йолини хатирилиди.

Әлвәттә, һәрбир иҗадий мәвсүм ахирида униң нәтиҗиси баһалиниду. Йәни һәрбир сәһнә әсәри яки иҗадий мәһсулат сәнъәт дәргаһиниң артистлири үчүнму йеңи утуқларға йол ачиду. Бу җәһәттин театр тәрипидин тәсис қилинған «Чолпан» мукапити артистларниң әмгигигә берилидиған әң мунасип баһаларниң бири болуп кәлмәктә. Бу қетимму тамашибинларниң аваз бериши арқилиқ 92-мәвсүмниң «әң яхшилири» ениқланди. Йәни «Әң яхши нахшичи» номинациясигә Қазақстанниң хизмәт көрсәткән әрбаби Нуралим Варисов, «Әң яхши актер» номинациясигә Шөһрәт Мәмәтов, шундақла «Әң яхши актриса» номинациясигә Алийәм Ибдиминова, «Әң яхши уссулчи» номинациясигә Сәйпидин Мамут билән Шахрия Шерипидинова, «Әң яхши музыкант» номинациясигә Икрамҗан Лохманов еришти.

Мукапатларни театр мудири, Қазақстанниң хизмәт көрсәткән әрбаби, Дилмурат Баһаров вә театрниң бәдиий рәһбири Фархадбек Қанафин тәнтәнилик рәвиштә тапшурди. Ғалипларға «Чолпан» мукапитиниң дипломлири билән биллә театрниң һамийлириниң бири болған ForteBank намидин ахчилиқ сертификатлар тәғдим қилинди.

Қисқиси, 92-мәвсүмни Уйғур театриниң утуқлуқ иҗадий жили дәп ейтишқа толуқ асас бар. Йеңи әсәрләр, йеңи режиссерлуқ издинишләр, талантлиқ артистларниң хилму-хил образлири вә тамашибинларниң үзүлмәй келиши кәлгүси мәвсүмдә йәниму йеңи премьерилар, йеңи иҗадий утуқлар вә йеңи учришишларниң болидиғанлиғиға ишәндүриду.

Зульфира МАИСМЕЛИЕВА,
«Uiğur avazi»
https://uyguravazi.kazgazeta.kz/news/54533