Қ.Ғоҗамияров намидики җумһурийәтлик Дөләт академиялик Уйғур музыкилиқ комедия театрида паалийәт елип бериватқан атақлиқ сәнъәткарлиримиз Алмута шәһиридики уйғур мәктәплиридә билим еливатқан балилар билән учришишларни өткүзүшни әнъәнигә айландурди. У көпчилик арисида җәмийәтлик пикир һасил қилип, ундақ баш қошушларни йеза йәрлиридә давамлаштуруш тәкливини бериватқанларму бар. Төвәндә театрдики Әдәбият бөлүминиң башлиғи Гүлбаһар Насирова билән болған қисқа сөһбитимизни диққитиңларға һавалә қиливатимиз.
– Гүлбаһар Қасимқизи, мәктәп оқуғучилири билән болған учришишлардин алған тәсиратлириңиз қандақ?
– Барлиқ учришишлардин яхши тәсиратлар билән қайттуқ. Алмута шәһиридики А.Розибақиев намидики 153-мәктәп-гимназиядә вә 101-мәктәп-гимназиядә болуп, оқуғучилар билән иҗадий сөһбәтләр жүргүздуқ. Мошу учришишлардин кейин биздә, Уйғур театрида сәнъәткә қизиққучи барлиқ яшлар үчүн «Очуқ ишик күнини» уюштуруш ойи кәлди. Шу арқилиқ оқуғучилар арисида сәнъәткә иштияқ бағлиған талант егилириниң бар екәнлигигә толуқ көз йәткүздуқ. Оқуғучилар уйғур миллий саз әсваплирида ойнап, хәлиқ нахшилирини, һәтта муқамларни бабиға йәткүзүп иҗра қилди, шеир һәм монологларниму жуқури дәриҗидә ипадилик оқуп беришти. «Талантлар хәлиқниң арисида» дегән ибарә раст охшайду.
– Әксичә, улар силәргә «оюн» қоюп бериптудә...
– Шундақ болди. Мәктәпләргә болған сәпиримизниң мәхсити – балилиримизға атақлиқ сәнъәткарлиримизни тонуштуруш, уларни театрға тәклип қилиштин ибарәт еди. Чүнки жилдин-жилға бизниң репертуаримиз кәңийип, яшлар роһий озуқ алидиған әсәрлиримиз көпийиватиду. Концертлиқ программилиримизму жуқури дәриҗидә өтүватиду. Биздә мундақ қедимий, бай сәнъитимизни сақлап, әвлаттин-әвлатқа беҗирим йәткүзүш үчүн яшлиримизниң театрға келишини халаймиз. Уларниң арисидики сәнъәткә чин муһәббәт бағлиған һәқиқий талант егилиригә қолумиздин кәлгән ярдимимизни айимаймиз.
– Мәсилән...
– Бийил Т.Жүргенов намидики Қазақ миллий сәньәт академиясидә 2025 – 2026-оқуш жили «Музыкилиқ театр артисти» бойичә уйғур бөлүми ечилди. Әнди уссулчи, нахшичи болушни арман қилидиған яшларниң болса, 2025-жили 9-синипни түгәткән шаһадәтнамә билән, Ж.Елебеков намидики җумһурийәтлик Эстрада вә цирк колледжида билим елиш мүмкинчилиги бар. Миллий саз-әсваплирини челишни арзу қилидиған яшлиримиз бийилдин башлап 9 яки 11-синипни түгитип, П.Чайковский намидики музыкилиқ колледжида бәхтини синап көрүш имканийитигә егә болди. Бу оқуш орунлирида тәһсил көргән студентларниң келәчиги Уйғур театри билән зич бағлиқ болиду, әлвәттә. Театр – тирик организм. Шундақ екән, униңда өсүш-илгириләшләрниң дайим садир болуши, җүмлидин яш мутәхәссисләр билән театр коллективиниң йеңилинип туруши тәбиий һадисә. Мошу турғудин бизни саһалиқ оқуш орунлирила әмәс, Қазақстанниң Мәдәнийәт вә әхбарат министрлиги йеқиндин қоллап, келәчәк уйғур сәнъәткарлириниң йетилип чиқиши үчүн һәртәрәплимә шараит яритип беришкә тәйяр.
– Шәһәрдики яш талантлар билән қоюқ мунасивәт орнитип, қизғин иш елип бериватқиниңларға бәк хурсәнтмиз. Әнди биздә бу имканийәттин йеза яшлири чәттә қаламдикин, дегән әндишә бар...
– Биз мәсилиниң бу тәрипигиму көңүл бөлүватимиз. Булту оғуз ейида хәлқимиз вәкиллири зич яшайдиған Панфилов, Уйғур һәм Әмгәкчиқазақ наһийәлириниң мәркәзлиридә болуп, мәктәп мудирлири, муәллимләр билән учришишларни өткүздуқ. Келәчәктә йеза мәктәплиригиму баридиған оюмиз бар.
– Сөһбитиңизгә рәхмәт!
Сөһбәтләшкән
Бәхтишат СОПИЕВ,
«Uiğur avazi»
https://uyguravazi.kazgazeta.kz/news/52873
– Гүлбаһар Қасимқизи, мәктәп оқуғучилири билән болған учришишлардин алған тәсиратлириңиз қандақ?
– Барлиқ учришишлардин яхши тәсиратлар билән қайттуқ. Алмута шәһиридики А.Розибақиев намидики 153-мәктәп-гимназиядә вә 101-мәктәп-гимназиядә болуп, оқуғучилар билән иҗадий сөһбәтләр жүргүздуқ. Мошу учришишлардин кейин биздә, Уйғур театрида сәнъәткә қизиққучи барлиқ яшлар үчүн «Очуқ ишик күнини» уюштуруш ойи кәлди. Шу арқилиқ оқуғучилар арисида сәнъәткә иштияқ бағлиған талант егилириниң бар екәнлигигә толуқ көз йәткүздуқ. Оқуғучилар уйғур миллий саз әсваплирида ойнап, хәлиқ нахшилирини, һәтта муқамларни бабиға йәткүзүп иҗра қилди, шеир һәм монологларниму жуқури дәриҗидә ипадилик оқуп беришти. «Талантлар хәлиқниң арисида» дегән ибарә раст охшайду.
– Әксичә, улар силәргә «оюн» қоюп бериптудә...
– Шундақ болди. Мәктәпләргә болған сәпиримизниң мәхсити – балилиримизға атақлиқ сәнъәткарлиримизни тонуштуруш, уларни театрға тәклип қилиштин ибарәт еди. Чүнки жилдин-жилға бизниң репертуаримиз кәңийип, яшлар роһий озуқ алидиған әсәрлиримиз көпийиватиду. Концертлиқ программилиримизму жуқури дәриҗидә өтүватиду. Биздә мундақ қедимий, бай сәнъитимизни сақлап, әвлаттин-әвлатқа беҗирим йәткүзүш үчүн яшлиримизниң театрға келишини халаймиз. Уларниң арисидики сәнъәткә чин муһәббәт бағлиған һәқиқий талант егилиригә қолумиздин кәлгән ярдимимизни айимаймиз.
– Мәсилән...
– Бийил Т.Жүргенов намидики Қазақ миллий сәньәт академиясидә 2025 – 2026-оқуш жили «Музыкилиқ театр артисти» бойичә уйғур бөлүми ечилди. Әнди уссулчи, нахшичи болушни арман қилидиған яшларниң болса, 2025-жили 9-синипни түгәткән шаһадәтнамә билән, Ж.Елебеков намидики җумһурийәтлик Эстрада вә цирк колледжида билим елиш мүмкинчилиги бар. Миллий саз-әсваплирини челишни арзу қилидиған яшлиримиз бийилдин башлап 9 яки 11-синипни түгитип, П.Чайковский намидики музыкилиқ колледжида бәхтини синап көрүш имканийитигә егә болди. Бу оқуш орунлирида тәһсил көргән студентларниң келәчиги Уйғур театри билән зич бағлиқ болиду, әлвәттә. Театр – тирик организм. Шундақ екән, униңда өсүш-илгириләшләрниң дайим садир болуши, җүмлидин яш мутәхәссисләр билән театр коллективиниң йеңилинип туруши тәбиий һадисә. Мошу турғудин бизни саһалиқ оқуш орунлирила әмәс, Қазақстанниң Мәдәнийәт вә әхбарат министрлиги йеқиндин қоллап, келәчәк уйғур сәнъәткарлириниң йетилип чиқиши үчүн һәртәрәплимә шараит яритип беришкә тәйяр.
– Шәһәрдики яш талантлар билән қоюқ мунасивәт орнитип, қизғин иш елип бериватқиниңларға бәк хурсәнтмиз. Әнди биздә бу имканийәттин йеза яшлири чәттә қаламдикин, дегән әндишә бар...
– Биз мәсилиниң бу тәрипигиму көңүл бөлүватимиз. Булту оғуз ейида хәлқимиз вәкиллири зич яшайдиған Панфилов, Уйғур һәм Әмгәкчиқазақ наһийәлириниң мәркәзлиридә болуп, мәктәп мудирлири, муәллимләр билән учришишларни өткүздуқ. Келәчәктә йеза мәктәплиригиму баридиған оюмиз бар.
– Сөһбитиңизгә рәхмәт!
Сөһбәтләшкән
Бәхтишат СОПИЕВ,
«Uiğur avazi»
https://uyguravazi.kazgazeta.kz/news/52873