Әссалам, Норуз!

Йеқинда җумһурийәтлик дөләт академиялик Уйғур музыкилиқ комедия театрида «Нава» фольклор ансамблиниң «Әссалам, Норуз!» намлиқ мәйрәмлик концерти өтти.

Һәрқандақ миллий һәм дөләтлик мәйрәм ләрдә өз тамашибинлириға роһий соға һәдийә қилишни әнъәнигә айландурған театр коллективи бу қетимму көпчилик көңлидин чиққидәк концерт уюштурупту. Бу күни хәлқимизниң алтун бөшүги болған театримизда миллий нахша-сазлиримиздин сирт, қериндаш қазақ хәлқиниң күй-сазлири, өзбәк хәлқиниң уссули һәм Иран композитори Бижан Мортазавиниң «Тофан Шторм» композицияси иҗра қилинди.

Концерт давамида тамашибинлар талантлиқ нахшичилар Дилбәр Бурһанова, Луиза Розахунова, Сәйярә Сетәкованиң вә яш һәм келәчигидин үмүт күткүзидиған сәнъәт карлиримиз Меһрат Рәхмәтҗан, Саһиб Абдумайинниң иҗрасидики нахшилардин бәһирләнди. «Рухсарә» уссул ансамблиниң уссулчилири уларниң нахшилириға өзлириниң әвришим уссуллири билән җор болди. Қазақстанниң хизмәт көрсәткән әрбаби, тәмбүрчи Марат Норузов сәһнигә көтирилгәндә, көпчилик уни алқишлар билән қарши алди. Өз новитидә, сәнъәткар уларға хәлиқләр достлуғини ипадиләйдиған бир түркүм надир сазлардин чачқа чечип, мухлислирини техиму хошаллиққа бөлиди.

Дәрһәқиқәт, сәнъәт карлиримиз тамашибинларға унтулмас мәйрәмлик кәйпият беғишлиди. Улар барлиқ талант-қабилийитини йәнә бир қетим намайиш қилған һалда, көпчиликкә роһий озуқ әта қилди. Мошу йәрдә концертни тәйярлиғанлар, атап ейтсақ, театрниң Әдәбият бөлүминиң рәһбири Гүлбаһар Насирова, «Нава» ансамблиниң рәһбири Назимҗан Палтахунов, балетмейстер Һәҗәрбүви Халимова, режиссер Бәхитҗан Авдуновниң әҗрини тәкитлимәй мүмкин әмәс. Чүнки улар сәһнә кәйнидә концертниң жуқури дәриҗидә өтүшигә өз үлүшини қошти.

Зульфира МАИСМЕЛИЕВА,

«Uiğur avazi»
https://uyguravazi.kazgazeta.kz/news/54242