Артистлар тәтилдә

Өткән һәптидә Қуддус Ғожамияров намидики Жумһурийәтлик дөләт академиялик Уйғур музыкилиқ - комедия театрида 90 - мәвсүмниң йепилиши йәни коллективниң бир айлиқ тәтилгә чиқишиға даир баш қошуш болуп өтти.

Бу хусусида мудирниң тәшкилий ишлар бойичә ярдәмчиси Надирәм Өмәрова биз билән болған сөһбәттә өз ой - пикрини мундақ ипадилиди: - мәһкимә коллективи билән өткән баш қошуш жәриянида театр мудири,Қазақстанниң хизмәт көрсәткән әрбаби Дилмурат Нурахмәт оғли театр тәвәллудиға сәнъәткарлиримизниң наһайити жуқури тәйярлиқлар билән келип,у - бу қоюлумларни тамашибинға тәвсийә қилишта һаман ижадийлиқ турғусида әмгәк қилип келиватқанлиғини,бундин кейинму мошундақ роһта иш - паалийәт елип бериш һажәтлигини мәмнунлуқ илкидә тилға алди.Ижадий ишлириға мувапәқийәт тилиди.Бу хилдики иллиқ тиләк,ләвизлирини Қазақстанниң хизмәт көрсәткән әрбаплири Алимжан Әйсаев,Пәрһат Давутов,әдәбият бөлүминиң башлиғи," Һөрмәт" ордениниң саһиби Гүлбаһар Насирова,театрниң бәдиий рәһбири Фархат Канафинларму изһар қилди, - дәп Надирәм Өмәрова сөһбитини төвәндикичә давамлаштурди. - Муқәддәс театримизниң 90 жиллиғи һарписида өткүзүлгән чарә - тәдбирләрдин көпчилик яхши хәвәрдар яки шаһиди болди,дәп ойлаймиз.Жумһурийитимиз миқиясида тариливатқан йетәкчи қәрәллик нәширләр,жүмлидин силәрниң "Или вадиси" гезитидиму бу һәқтә кишидә иллиқ һис - туйғуларни қозғайдиған көләмлик мақалилар йруқ көрди,оқурмәнгә йәткүзүлди.Театр мәмурийити намидин журналистларға ейтар алқишимиз чәксиз.Пурсәттин пайдилинип,театр йенида тәсис қилинған "Чолпан" мукапитиға муйәссәр болған сәнъәткарлар тоғрисидиму қисқичә тохтилип кәтсәм артуқ болмас,дәп ойлаймән.Бу хилдики атаққа Мухидин Варисов(Әң яхши актёр),Эмина Рәхмәтжан(Әң яхши актриса),Гүлнарәм Турсунова(Әң яхши уссулчи),Михрат Рәхмәтжан(Әң яхши нахшичи) шундақла Пәрһат Палтаев(Әң яхши сазәндә) сазавәр болди.Ғалипларға театр мудири мәхсус диплом,статуэтка вә баһалиқ соғиларни тән - тәнилик йосунда тапшурди.Тарихий вақиәгә мунасивәтлик қошумчә қилидиған йәнә бир муһим мәсилә - Дөләт вә Һөкүмитимиз рәһбәрлири,Қазақстан Жумһурийитиниң Мәдәнийәт,Әхбарат Министрлиги,Сенат,Мәжлис рәислири вә башқиму мәсъул,салаһийәтлик орунлар башлиқлириниң йоллиған Тәбрик хәт,инкаслири уйғур миллитигә,кәсипдашлиримизға билдүрүлгән чоң һөрмәт,дәп қобул қилсақ мубалиғә болмас.Қазақстан сәнъити билән мәдәнийитигә қошуватқан төһпилири мунасип баһаланған онлиған артистлар Дөләт вә Министрлик тәрипидин алий дәрижилик унван,мукапатлар билән тәғдирләнгәнлигиниму алаһидә қәйт қилған орунлуқ.Ейтмақчи,Қазақстанниң "Еңбек Ері",СССР хәлиқ артисти,М.Әвезов намидики Қазақ Миллий драма театриниң бәдиий рәһбири,Қазақстан театрлар ассоциясиниң президенти Асанәли Әшимов йешиниң чоңайғиниға қаримай 90 жиллиқ мәрасимға кәсипдашлирини қоллап - қувәтлигән һалда алайтән қәдәм тәшрип қилиши,қутлуқ сәһнә төридә театрниң 100 жиллиқ мәрикисини ЮНЕСКО даирисидә дағдуғилиқ атап өтүш тәшәббусини оттуриға ташлиши көпчилик тамашибин қәлбидә қизғин һиссият,һаяжан туйғулирини пәйда қилғанлиғини алаһидә тилға алмақ лазимдур.Чүшәнгән,билгән адәмгә бу тәшәббус өмлүк,иттипақлиқта әзәлдин яшап келиватқан икки милләт оттурисиға селинған мустәһкәм көрүк,чин достлуқниң сәмимий ипадисидур, - дәп сөзини йәкүнлиди Надирәм Өмәрова.

Өз нөвитидә бизму шу сәмимийлик турғусида ейтилған тиләкниң тәрәпдари.Илаһим,миллий сәнъитимизниң муқәддәс очиғи һесапланған театрда иш - паалийәт елип бериватқан униң коллективиға йеңи мәвсүмни ижадий издиниш,жошқун илһам,йеңи күч - қувәт билән сәһнә пәрдисини ачидиғанлиғиға ишәнчимиз камил.

Иминжан Тохтияров.
Алмута шәһири.

"Или вадиси" гезити