Бурнакүн Уйғур театрида миллий сәнъитимизгә қошқан унтулмас төһпилири арқилиқ хәлқимизниң зор һөрмәт-еһтирамиға еришкән Әкбәровлар сулалисиниң ярқин намайәндиси – хәлқимизниң сөйүмлүк сәнъәткари, Қазақстанниң хәлиқ артисти Зенәтгүл Әсқәрқизи Әкбәрова тәвәллудиниң 90 жиллиғиға беғишланған хатирә кәч болуп өтти.
Зенәтгүл Әкбәрова театрға дәсләп уссулчи болуп келип, уйғур уссул сәнъитиниң тәрәққиятиға көп әҗир сиңдүргән болса, кейин драма әсәрлири арқилиқ кәң тамашибинларға тонулди. Сәһнимиздә 90 жил давамида көплигән режиссерлар қайта-қайта сәһниләштүрүлүп келиватқан «Анархан» музыкилиқ драмиси бизгә аримиздин кетип қалған Анарханлар билән Һәмраларни ихтиярсиз әслитиду. Театримизда жигирмә жил давамида баш режиссер болуп паалийәт елип барған Сергей Башоян сәһниләштүргән «Анархан», «Ғерип-Сәнәм», «Назугум», «Таһир-Зоһра, «Малиновкидики той», «Аршин мал алан», «Майсариниң иши, «Қара гүл» қатарлиқ музыкилиқ драмиларниң һәммисидә Зенәтгүл Әкбәрова баш қәһриманларниң образлирини яритишқа муваппәқ болған. У өзигә хас иҗрачилиғи биләнму бир түркүм хәлиқ нахшилирини вайиға йәткүзүп орунлиған.
Зенәтгүл Әкбәрова театримизда ишлигән әллик жилдин ошуқ паалийитидә байиқи назук, нәпис һәм лирик қәһриманлар билән биллә «Қыз Жібек», «Өмәр Муһәммәдий», «Кәчүр мени, аниҗан», «Бир яз, бир қиш», «Чәтәллик», «Шәнбә күни – тойға», «Ханума» кәби сәһнә әсәрлиридә тәғдири һәрхил, түрлүк характерлиқ образларни яратти. Сәнъәткарниң комедия жанридиму тәңдиши йоқ маһарәт егиси екәнлигини испатлиди. Әйнә шундақ даңлиқ сәнъәткаримиз өзиниң көпқирлиқ маһарити арқилиқ уйғур сәһнисидә келәчәк яшлиримиз үчүн чоң бир үгиниш һәм тәҗрибә мәктивини яратти.
Хатирә кечидә яш сәнъәткарлар Луиза Розахунова, Дилназ Қавдунова, Варисҗан Абдуллаев хәлиқ артисти өз вақтида ойниған образларни яритип, тамашибинларға өтмүшни әсләтти. Өз новитидә, Зенәтгүл Әкбәрова билән талай сәһнә әсәрлиридә биллә рольлар ойниған Қазақстанниң хизмәт көрсәткән әрбаби Пәрһат Давутов устазиниң сөйүп тиңшиған нахшиси «Зоһра җанимни» ейтип бәрди.
Әкбәровлар сулалисидин Қазақстанниң хизмәт көрсәткән әрбаби, профессор Әнвәр Әкбәров рәһбәрлигидә «Тропою грома» балетидин көрүнүшни Қурманғази намидики қазақ миллий консерваториясиниң камерлиқ оркестри иҗра қилса, Қазақстанниң хизмәт көрсәткән әрбаби Алимҗан Әкбәров нәвриси Аружан билән бир нахша һәдийә қилди.
З.Әкбәрова талай жиллар сәһнидә биллә жүргән Қазақстан хәлиқ артисти Реһангүл Мәхпирова сәнъәткар һәққидә өз хатирилири билән бөлүшүп, нахша иҗра қилса, Қазақстанниң хизмәт көрсәткән әрбаби Алимҗан Әйсаев кәсипдиши билән өткән унтулмас дәқиқиләрни әскә алди.
– Зенәтгүл һәдә сәһнидә 100дин ошуқ образларни яратти, – дәп сөзини башлиди у. – Йүз образ, демәк, йүз мүҗәз. Мунчилик җавапкәрликниң һөддисидин чиқиш һәркимниң қолидин келивәрмәйду. Шуңлашқа болса керәк, у тамашибинларға тез-арида тонулуп кәтти. Гастрольда жүргинимиздә кочида бир топ артистлар кетип барсақ, тонур бешида олтарған икки аял алдимизға жүгрәп келип, аримиздин пәқәт Зенәтгүл һәдимизни қучақлап сөйгән вақитларму болған. Наһийәләргә барғанда артистларни өй-өйләргә бөлүветәтти. Зенәтгүл һәдимиз чоңлар билән башқа өйгә кәтти. Биз чүшкән өй егилири: «Биз Әкбәровани күткән» дәп бизни қобул қилмиған пәйтләрму учришатти. У һәқиқий хәлқи сөйгән сәнъәткар еди.
Уйғур театри әдәбият бөлүминиң башлиғи Гүлбаһар Насирова тәрипидин тәйярланған бу хатирә кечи яшларда чоңқур тәсират қалдуруп, чоңларниң өтмүшини бир чарлап чиқишиға имканийәт яратти.
Надирәм ӨМӘРОВА,