Дәм ғенимәт – дидар ғенимәт

Көрүшүш күни – елимизниң ғәрбидә яхши сақланған әнъәнә болса керәк. Чүнки студентлиқ чеғимда топта биллә оқуйдиған «ғәриплик» савақдашлирим норузниң он төртинчи күни бир-бирини бағриға бесип, «жаңа жасыңмен, бауырым» дәп тәбриклишәтти. Һә бүгүнзә бу көкләм пәслиниң башлинишини билдүридиған әһмийәтлик күн болуп, «Норузнамә» дәп атилидиған мәйрәмлик онкүнлүкниң дәсләпкиси һесаплиниду.

Шуңлашқиму адәмләр бир-бири билән қучақлишип көрүшүп, бир-бирини баһарниң келиши билән тәбрикләп, изгү тиләклирини изһар қилиду. Мәзкүр әнъәнә бу қетим сәнъәт саһасида хизмәт қиливатқан иҗадий коллективлар арисида давамлашти.

Қуддус Ғоҗамияров намидики җумһурийәтлик дөләт академиялик Уйғур музыкилиқ комедия театрида Амал мәйримигә беғишланған чарә-тәдбир өткүзүлди. Униңға Қазақстанниң бирқатар этнотеатрлар коллективлири қатнашти. Җүмлидин Н.Сац намидики дөләт академиялик Рус балилар вә өсмүрләр театри, җумһурийәтлик академиялик Корей музыкилиқ комедия театри вә җумһурийәтлик академиялик Немис драма театриниң вәкиллири мәзкүр мәрасимда баш қошти.

Мәйрәмлик чарә-тәдбир давамида меһманларниң диққитигә алаһидә көргәзмә уюштурулди. Униңдин һәр этносниң әнъәнивий таамлири орун елип, меһманлар хәлиқләр мәдәнийитиниң байлиғиға йәнә бир қетим гува болди. Шундақла баш қошқан төрт театр артистлириниң қатнишишидики концертлиқ программа көпчилик диққитигә һавалә қилинди. Сәһнидә һәрхил тилларда яңриған нахша-сазлар, қоюлумлар вә миллий уссуллар һәқиқий мәнасида сәнъәткарлар арисидики иҗадий һәмкарлиқни һасил қилди.

Мәйрәмниң тәнтәнилик қисмида сөзгә чиққан сәнъәт әһли бу күниниң достлуқ вә мәдәний алақиләрни күчәйтиштә муһим әһмийәткә егә екәнлигини тәкитлиди. Җүмлидин Уйғур театри мудириниң орунбасари Надирәм Өмәрова, бәдиий рәһбәр Фархадбек Қанафин, Қазақстанниң хизмәт көрсәткән әрбаби, театр актери Алимҗан Әйсаев паалийәткә жиғилғанларни Амал мәйрими билән тәбрикләп, иллиқ тиләклирини билдүрди. Униңдин сирт Н.Сац намидики театрниң актрисиси, Қазақстанниң Хәлиқ артисти, «Құрмет» ордениниң саһиби Ольга Коржева, немис театриниң бәдиий рәһбири Наталья Дубс вә корей театриниң мудири Наталья Ли өзлириниң тәбрик сөзлирини ейтип, бу хил учришишларниң театрлар арисидики достлуқни мустәһкәмләйдиғанлиғини қәйт қилди.

Чарә-тәдбир даирисидә Надирәм Өмәрова иҗадий коллективларға достлуқ вә һәмкарлиқниң рәмзи сүпитидә театр мудириниң тәшәккүрнамиси билән хатирә соғилирини тапшурди.

Амал мәйримигә беғишланған мәдәний чарә-тәдбир «Норузнамә» онкүнлүгиниң муқәддимиси болуп, театр коллективлириниң иҗадий һәәмкарлиғини күчәйтишигә йеңи пурсәт яратти.

Зульфира МАИСМЕЛИЕВА,
«Uiğur avazi»
https://uyguravazi.kazgazeta.kz/news/54239